[center]يابنات انا لازلت اذكر اول ساعتين من ليلة الدخلة ،، تحديدا من دخلنا الفندق وجلسنا في الصالون والعشى يا هي احداث بكمية قليلة من الكلام وكمية هايلة من المشاعر
انا ما شفت زوجي قبل الدخلة لا عندنا خطبة ولا ملكة ولا خربطة ولا تيلفون حتى، بس شفت صورة في جريدة الرياض مره وكان مقبول الشكل بس جبهته كبيره وهو يلقي كلمة في منظمة العمل الدولية
قضى ليلة العرس وانا في البيت " لان ما عندنا شرعة " وكان بيتنا فاضي مافيه الا الخدامه وخواتي وامي طالعين من المغرب للعرس لان زواجاتنا تبدى بدري وتنتهي بدري المهم انا كنت رجعت من الكوافيره من العشى ومعي ا ختي الكبيرة وعلى طول وصلتني ودعت لي وركض على العرس وكانت يمكن ثلاث او اربع ساعات قبل يجي ياخذني وكنت في قمة الرعب وكل شوي اطل في المرايه وتطلع لي ملاحظات سخيفه على شكلي ومرت الدقائق ورى الدقايق وانا ماغير اكل في نفسي الا اخوي يكلم يقول جاهزة انا وزوجك بنطلع من القصر وقلت ايه (ايه) ثلاثه حروف مدري كيف طلعت وباي لهجه طبعا هو اتصل على جوالي ما رديت قام دق على البيت وردت الخدامة ونادتني المهم نص ساعه رعب لحد ما سمعت الباب يفتح ويبدا الفلم
حط اخوي شناطي في السيارة وكنت بركب ورى من الخرعه قال اخوي قدام قدام يا هانم وهو يضحك وزوجي كان هو اللي يسوق ركبت
هلا يالله حيها نور المكان
- ولا كلمة مني
وصار يقول كلام ورب الكعبة ما ادري وش يقول بس فهمت انه زمان عن الرياض وانو الرياض متغير عليه وعسى يدل الفندق لاحضو وانا لسا ما شفته
المهم وصلنا وطلعنا للغرفة وكانت حلووه مررره كان سويت صغير بس حلو لاحظت هذا رغم الخوف جلسني على كنبه مفرده وقلت الحمدلله ما يجلس جنبي وراح نزل شماغه على الطاولة وجواله وجلس على الكنبه اللي بجنبي يعني هو وجهه للتلفزيون وجهي انا للنافذه يعني ما شوفه على يميني ماشوف الا السراميك وربي حفظت عددهم
- يالله حيها
- ولا كلمة
- سكت شوي
- وانا لا حياة لمن تنادي
- تصدقين توقعتك جميلة !
- كان عندي خوف ويوم سمعت كلامه قسم بالله العظيم حسيت احد راميني من برج المملكة
- كمل : لان امي قالت لي انك حلوة !
- حسيت اني خلاص قربت اوصل الارض انسطح ، احس بطني كله طلع فوق لصدري من الخوف وربي حالة رعب رهيب
- بس انتي طلعتي احلى بنت شافتها عيني !!!
- والله يابنات ان دمعتي نزلت ولاحظوا اني لسى عيني على السراميك ما شفت منه شي
اللي خلاني اكتب الموضوع الحوار اللي صار رغم انه كان ثواني بين كلمة توقعتك جميلة وبين كلمة طلعتي احلى بنت شفتها في حياتي
كان الفارق ثواني بس كانت مثل السنين مثل العزا طويل مادري كيف كان العقل يمط الثواني وتصير دقايق وساعات وسنين
من عمر زوجها في ليلة دخلتها سحبها على وجهها كذا ؟
بالنسبه لي ماتوقت بس كانت ليلة بكل مافيها من خوف وقلق وترقب ورعب بس كانت احلى ليلة
منقول للعبرة
وحياكم[/center]
